الى ابنتى اسراء

الفنانه سمية الألفي كتبت:

مش قادرة اسكت اكتر من كدة حاسة انى باتخنق ..عملت اية اسراء عشان البهدلة دى كلها ..عملت اية عشان تركب عربية الترحيلات زى المجرمين .. تترمى فى زنزانة و تتهان ..لية دة كلة و يعنى اية النائب العام يفرج عنها و بعدين ما ترجعش لحضن امها هو احنا فين ؟؟احنا فين هى دى بلدنا ؟؟ هى دى مصر ؟؟انا مش مصدقة حقيقى مش مصدقة ياريتنى ما عشت لحد دلوقتى ياريت السرطان وهو بياخد اختى من سنتين كان خدنى معاها..ياحبيتى يا اسراء يا حبيبتى يا بنتى ايوة بنتى دى قد احمد ابنى بالظبط ..ياترى مستحملة ازاى ..ياترى بيعاملوكى ازاى ..كل دمعة بتنزل من عينك بتحرق قلبى و قلب كل ام فى مصر ..مصر !! فين رجالتك يا مصر ؟؟ ازاى قادرين يناموا و يشخروا ؟؟ ازاى قادرين تاكلوا ؟؟ ازاى قادرين لسة تقفوا فى طوابير العيش ؟؟ ازاى قادرين تعيشوا عادى كدة ولا كأن حاجة حصلت ؟؟ من اول يوم و انا عايزة اصرخ و اكتب بس كنت خايفة !! مش قادرة اصدق انى بقيت خايفة كدة فى بلدنا !! طول عمرنا كنا مطمنين فيك يا مصر ..اية اللى حصل ؟؟ ازاىبقينا كدة ؟؟ رجعوا اسراء لحضن امها ..استحلفكم باللة الواحد القهار رجعوا اسراء لحضننا ..انا ما عرفهاش و لا عمرى شفتها لكن قلبى موجوع عليها بكتب و دموعى سابقة حروفى ..رجعوها خلاص فهمنا خلاص خفنا قوى و اللة ..خلاص حنحط الجزمة فى بقنا و نخرس بس رجعوها ..رجعوها